आकाशात सूर्याभोवती दिसले सुंदर वलय; दुपारी एकच्या सुमारास दुर्मीळ नैसर्गिक दृश्याने वेधले नागरिकांचे लक्ष
प्रतिनिधी l करमाळा (माय मराठी न्यूज)
करमाळा तालुक्यात शनिवारी दुपारी सुमारे एक वाजेच्या दरम्यान आकाशात सूर्याभोवती मोठे गोलाकार वलय दिसल्याने नागरिकांमध्ये उत्सुकता निर्माण झाली. अनेकांनी हे दुर्मीळ दृश्य मोबाईलमध्ये कैद करत सोशल मीडियावर फोटो व व्हिडिओ शेअर केले. काही काळ हे वलय स्पष्टपणे दिसत असल्याने अनेक जण आश्चर्यचकित झाले.
सूर्याभोवती दिसणारे हे गोलाकार रिंगण ही एक खगोलशास्त्रीय आणि नैसर्गिक घटना असून याला ‘सोलर हॅलो’ (Solar Halo) किंवा मराठीत ‘खळे’ असे म्हटले जाते. ही घटना कोणत्याही ग्रहणाशी किंवा अपशकुनाशी संबंधित नसून पूर्णपणे नैसर्गिक आणि वैज्ञानिक कारणांमुळे घडते.
करमाळा तालुक्यात दुपारी एकच्या सुमारास दिसलेले हे मनमोहक दृश्य अनेकांसाठी आकर्षणाचा विषय ठरले. काहींनी प्रथमच सूर्याभोवती असे गोलाकार वलय पाहिल्याचे सांगितले. निसर्गाच्या या अनोख्या चमत्काराने नागरिकांना काही क्षण थांबून आकाशाकडे पाहण्यास भाग पाडले आणि सोशल मीडियावरही या दृश्याची मोठी चर्चा रंगली.
कसे तयार होते सूर्याभोवतीचे वलय?
वैज्ञानिकांच्या माहितीनुसार, पृथ्वीपासून सुमारे २० हजार फूट किंवा त्याहून अधिक उंचीवर अतिशय पातळ आणि पांढरे ‘सीरस’ (Cirrus) ढग असतात. या ढगांमध्ये पाण्याचे थेंब नसून लाखो सूक्ष्म बर्फाचे स्फटिक (Ice Crystals) असतात. सूर्याची किरणे या स्फटिकांमधून जाताना त्यांचे अपवर्तन (Refraction) आणि काही प्रमाणात परावर्तन होते. त्यामुळे सूर्याभोवती सुमारे २२ अंशांच्या त्रिज्येचे गोलाकार वलय तयार होते. यालाच सोलर हॅलो किंवा सूर्यवलय म्हणतात.
हवामान बदलाचे संकेत…
हवामानशास्त्राच्या दृष्टीने अशा प्रकारचे सूर्यवलय दिसणे म्हणजे वातावरणाच्या वरच्या थरात आर्द्रता वाढल्याचे लक्षण मानले जाते. त्यामुळे लवकरच हवामानात बदल होण्याची किंवा पाऊस पडण्याची शक्यता असल्याचा अंदाज व्यक्त केला जातो. मात्र, हे निश्चित भाकीत नसून हवामानातील संभाव्य बदलाचा एक नैसर्गिक संकेत मानला जातो.
About The Author
