प्रतिनिधी l करमाळा (माय मराठी न्यूज)
करमाळा तालुक्यातील आगामी जिल्हा परिषद व पंचायत समिती निवडणूक–२०२६ च्या पार्श्वभूमीवर निवडणूक कामकाजासाठी नेमणूक होणाऱ्या कर्मचाऱ्यांबाबत न्याय्य व संवेदनशील धोरण राबवावे, अशी मागणी करमाळा तालुका प्राथमिक शिक्षक समन्वय समितीने केली आहे. यासंदर्भात समितीच्या वतीने तहसील कार्यालयात मा. निवडणूक निर्णय अधिकारी यांना सविस्तर निवेदन सादर करण्यात आले.
निवेदनात केंद्राध्यक्ष (Presiding Officer) म्हणून कर्मचाऱ्यांची नेमणूक करताना वेतनश्रेणीनुसारच जबाबदारी देण्यात यावी, अशी ठाम भूमिका मांडण्यात आली. समान वेतनश्रेणीतील कर्मचाऱ्यांना समान कामकाज देण्यात यावे, जेणेकरून निवडणूक प्रक्रियेत कोणताही अन्याय किंवा असमतोल निर्माण होणार नाही, असे समितीने नमूद केले. तसेच निवडणूक कामकाजात सहभागी होताना अनेक कर्मचाऱ्यांना शारीरिक, मानसिक व कौटुंबिक अडचणींचा सामना करावा लागतो. याचा विचार करून महिला कर्मचारी, दुर्धर आजाराने ग्रस्त कर्मचारी, BLO म्हणून कार्यरत कर्मचारी तसेच ५५ वर्षांवरील वयाचे कर्मचारी यांना निवडणूक कामकाजातून वगळावे, अशी मागणीही करण्यात आली.
निवडणूक प्रक्रिया महत्त्वाची असली तरी कर्मचाऱ्यांचे आरोग्य, सुरक्षितता आणि सामाजिक जबाबदाऱ्या लक्षात घेणे तितकेच गरजेचे असल्याचे समितीने स्पष्ट केले. योग्य नियोजन व न्याय्य नेमणुकीमुळे निवडणूक प्रक्रिया पारदर्शक, सुरळीत आणि तणावमुक्त पार पडेल, असा विश्वास व्यक्त करण्यात आला.
यावेळी शिक्षक नेते हनुमंत सरडे, चंद्रहास चोरमले, राजकुमार खाडे, तात्यासाहेब जाधव, प्रमोद काळे, अजित कणसे व महेश निकत आदी उपस्थित होते. प्रशासनाने या मागण्यांकडे सकारात्मक दृष्टीने पाहून योग्य निर्णय घ्यावा, अशी अपेक्षा उपस्थित शिक्षक नेत्यांनी व्यक्त केली. या निवेदनामुळे निवडणूक कामकाजात कर्मचाऱ्यांच्या हक्कांबाबत व कल्याणाबाबत पुन्हा एकदा चर्चा सुरू झाली असून, प्रशासनाच्या निर्णयाकडे सर्वांचे लक्ष लागले आहे.
About The Author
