मांगीत भवानी माता यात्रेनिमित्त जंगी कुस्त्यांचा आखाडा; नामांकित मल्लांची उपस्थिती
प्रतिनिधी l करमाळा (माय मराठी न्यूज)
करमाळा तालुक्यातील मांगी येथे भवानी माता यात्रेनिमित्त दरवर्षीप्रमाणे यंदाही पारंपारिक आणि उत्साहपूर्ण वातावरणात विविध कार्यक्रमांचे आयोजन करण्यात आले आहे. अक्षय तृतीया (आखिती) निमित्त १९ एप्रिल रोजी यात्रा साजरी होत असून गावात सर्वत्र उत्साहाचे वातावरण निर्माण झाले आहे. गावाचे माजी राज्य मंत्री कै. दिगंबरराव बागल व माजी सभापती कै. भागवतराव बागल यांच्या परंपरेनुसार ही यात्रा शिस्तबद्ध आणि आदर्श पद्धतीने साजरी करण्याची परंपरा आजही कायम ठेवली जात आहे.
या यात्रेचे मुख्य आकर्षण म्हणजे पारंपारिक वाद्यांच्या गजरात निघणारी भवानी मातेची पालखी मिरवणूक आणि रंगीबेरंगी फटाक्यांची भव्य आतिषबाजी होय. गावातील सर्व धर्मीय नागरिक एकत्र येऊन ही यात्रा साजरी करतात, हे या यात्रेचे वैशिष्ट्य मानले जाते.
यात्रेच्या दुसऱ्या दिवशी म्हणजे सोमवार, दि. २० एप्रिल रोजी सायंकाळी ४ वाजता नगर-करमाळा रस्त्यालगत स्वाभिमानी शक्ती स्थळ येथे जंगी कुस्त्यांचा आखाडा रंगणार आहे. या कुस्ती स्पर्धेसाठी पुणे, अहिल्यानगर तसेच करमाळा तालुक्यातील नामांकित मल्ल सहभागी होणार असल्याने कुस्तीप्रेमींमध्ये उत्सुकता वाढली आहे.
गावातील ज्येष्ठ कै. अण्णासाहेब बागल, कै. गोपाळ भाऊ बागल व कै. मुरलीधर बागल यांनी घालून दिलेल्या परंपरेचा वारसा नवीन पिढी जपताना दिसत आहे. या कार्यक्रमाचे आयोजन कै. अण्णासाहेब बागल तालीम संघ, नवयुग मित्र मंडळ, भवानी माता यात्रा उत्सव कमिटी व विठ्ठल रखुमाई मंदिर समिती यांच्या वतीने करण्यात आले असून नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे.
About The Author
