प्रतिनीधी/ऋषिकेश चव्हाण
भारतीय जनता पार्टी करमाळा तालुक्याच्या वतीने मा. तहसीलदार साहेब यांना पेट्रोल व डिझेलवरील एक्साईज कर वाढ कमी करण्यासंदर्भातील लेखी निवेदन करमाळा भाजपा चे तालुकाध्यक्ष गणेश भाऊ चिवटे यांनी दिले.
यावेळी निवेदनात त्यांनी म्हटले आहे की, पंतप्रधान नरेंद्र मोदी यांच्या नेतृत्वाखालील केंद्र सरकारने दिवाळीच्या पूर्व संध्येला पेट्रोलवरील एक्साईज कर पाच रुपये प्रतिलीटर तर डिझेलवरील एक्साईज कर दहा रुपये प्रतिलीटर कमी करून जनतेला मोठा दिलासा दिला. केंद्र सरकारने कर कपात केल्यामुळे एकूण करांचा परिणाम ध्यानात घेता, महाराष्ट्रात प्रत्यक्षात पेट्रोल सहा रुपये व डिझेल बारा रुपये स्वस्त झाले आहे.
मोदी सरकारने ज्या प्रकारे पेट्रोल, डिझेलवरील करात कपात करून जनतेला दिलासा दिला त्याच प्रकारे राज्यातील महाविकास आघाडी सरकारनेही करात कपात करून जनतेला दिलासा दिला पाहिजे. अशी भारतीय जनता पार्टीची मागणी आहे. आपल्या राज्यातील सध्या सत्तेमध्ये असलेल्या महाविकास आघाडीच्या घटक पक्षांनी सातत्याने पेट्रोल व डिझेल दरवाढीच्या विरोधात आंदोलने केली होती. आता मोदी सरकारने पेट्रोल व डिझेलच्या दरात मोठा दिलासा दिल्यानंतर राज्यातील आघाडी सरकारनेही कर कपात करून आपल्या वतीने अधिक मदत केली पाहिजे, ही जनतेची स्वाभाविक अपेक्षा आहे. तथापि, अजूनही आपल्या सरकारकडून टाळाटाळ होत असल्याने आघाडीतील घटक पक्षांची आंदोलने म्हणजे केवळ राजकीय मतलबीपणा होता हे स्पष्ट झाले आहे. भाजपाशासित राज्यांनी नागरिकांना करात कपात करून अधिकची सवलत दिली पण महाराष्ट्राने दिलेली नाही, याची नोंद घ्यावी.
राज्यात डिझेलवर २४ टक्के व्हॅट आकारला जातो आणि पेट्रोलवर २५ टक्के व्हॅट आकारला जातो. त्या खेरीज पेट्रोलवर प्रती लिटर नऊ रुपये सेसही आहे. यामध्ये दुष्काळासाठी लागू केलेल्या तीन रुपये प्रतिलीटर सेसचा समावेश आहे. राज्य सरकारला पेट्रोल डिझेलवर करापोटी तीस ते चाळीस रुपये प्रति लिटर मिळतात. आमची मागणी आहे की, राज्य सरकारने पेट्रोल व डिझेलवरील व्हॅट कमी करून मोदी सरकारप्रमाणेच पेट्रोलसाठी पाच रुपये तर डिझेलसाठी दहा रुपये सवलत द्यावी. तसेच, राज्यात दुष्काळी स्थिती नाही, त्यामुळे पेट्रोलवरील प्रती लीटर तीन रुपये दुष्काळी सेस ताबडतोब रद्द करावा. ही कपात व्हॅट कमी केल्यामुळे मिळणाऱ्या सवलतीशिवाय अतिरिक्त असावी असे म्हटले आहे.
यावेळी जिल्हा सरचिटणीस किरण बोकन, राज्य परिषद सदस्य बाळासाहेब कुंभार, तालुका उपाध्यक्ष रामभाऊ ढाणे, मिरगव्हाण चे सरपंच मच्छिंद्र हाके, दादा देवकर, विनोद महानवर, कामगार आघाडीचे तालुकाध्यक्ष अशोक मोरे, युवा मोर्चा शहराध्यक्ष ऋषी फंड, दत्तात्रय गाडे, विशाल साळुंखे, भैया कुंभार, शरद कोकीळ, किरण शिंदे, बाळा जाधव व आदी कार्यकर्ते उपस्थित होते.
About The Author
