प्रतिनिधी/अंगद भांडवलकर
राष्ट्रवादी काँग्रेस चे प्रदेशाध्यक्ष ना. जयंतराव पाटील साहेब यांनी सुरू केलेली राष्ट्रवादी परिसंवाद यात्रा आज करमाळ्यात आमदार संजय मामा शिंदे संपर्क कार्यालय येथे संपन्न झाली. या परिसंवाद यात्रेचे उद्घाटन महाराष्ट्र राज्याचे जलसंपदा मंत्री तथा राष्ट्रवादी काँग्रेसचे प्रदेशाध्यक्ष ना. जयंतराव पाटील, सोलापूर जिल्ह्याचे पालकमंत्री ना. दत्तात्रय भरणे मामा या प्रमुख मान्यवरांच्या हस्ते संत गाडगे महाराज व कै. विठ्ठलराव शिंदे यांच्या प्रतिमेचे पूजन करून झाले.
याप्रसंगी व्यासपीठावर राष्ट्रवादी काँग्रेस पक्षाचे पक्ष निरीक्षक सुरेश घुले, प्रदेश उपाध्यक्ष दीपक आबा साळुंखे पाटील, जिल्हाध्यक्ष बळीराम काका साठे, राष्ट्रवादी युवक प्रदेशाध्यक्ष महबूब शेख, युवक कार्याध्यक्ष रविकांत वरपे, सोलापूर जिल्हा पक्षनिरीक्षक शरद भाऊ लाड, राष्ट्रवादी युवती प्रदेशाध्यक्ष सक्षणा सलगर, राष्ट्रवादी युवक प्रदेश उपाध्यक्ष प्रशांत बाबर, राष्ट्रवादी युवक जिल्हाध्यक्ष गणेश पाटील, प्रदेश युवती सरचिटणीस पूजा झोळे, राष्ट्रवादी युवती जिल्हाध्यक्ष श्रेया भोसले तसेच करमाळा तालुक्यातील महिला, युवक, युवती संघटनांचे व सर्व सेलचे पदाधिकारी मोठ्या संख्येने उपस्थित होते.
कार्यक्रमाचे प्रास्ताविक करताना करमाळा मतदार संघाचे आ. संजयमामा शिंदे म्हणाले की, राष्ट्रवादी काँग्रेस पक्ष, पवार कुटुंब व शिंदे कुटुंब यांचा अनेक वर्षापासून निकटचा संबंध आहे. पक्षाच्या पडत्या काळातही पक्षाला साथ देण्याचे काम शिंदे कुटुंबियांचे राहिले आहे. आज मी अपक्ष आमदार असलो तरी राष्ट्रवादी काँग्रेस पक्षाचे विचारसरणीपासून दूर गेलेलो नाही. पक्षाच्या माध्यमातून करमाळा तालुक्यासाठी कोरोना सारखे महाभयंकर संकट असताना भरीव निधी मला खेचून आणता आला. भविष्यकाळातही राष्ट्रवादी काँग्रेस पक्षाच्या मदतीने मतदारसंघातील प्रलंबित प्रश्न सोडवणे यासाठी पक्षाच्या सहकार्याची अपेक्षा आहे.
पालकमंत्री ना. दत्तात्रय भरणे म्हणाले की, सोलापूर जिल्ह्यामध्ये कोरोना कालावधीमध्ये सर्वांनी संघटितपणे काम केल्यामुळे कोरोना सारखे संकट वेळीच रोखता आले ही समाधानाची बाब असल्याचा उल्लेख केला. राष्ट्रवादी काँग्रेस पक्षाकडून सर्वसामान्य नागरिकांच्या अनेक अपेक्षा आहेत. या वर्षी मुख्यमंत्री ग्रामसडक योजने मधून जवळपास एक हजार किलोमीटर रस्ते सोलापूर जिल्ह्यासाठी मंजूर होऊन येतील ही खूप महत्त्वाची बाब असल्याचे त्यांनी आवर्जून सांगितले.
अध्यक्षीय मार्गदर्शन करताना नामदार जयंतराव पाटील म्हणाले की, आमदार संजयमामा शिंदे अपक्ष असले किंवा यापूर्वी ते कुठे होते ? हा भूतकाळ विसरून भविष्य काळामध्ये फक्त करमाळा तालुक्यापुरता विचार न करता त्यांनी सोलापूर जिल्ह्यामध्ये राष्ट्रवादी काँग्रेस पक्ष वाढीसाठी प्रयत्न करावेत. सर्वगुणसंपन्न असलेले नेतृत्व फक्त करमाळा तालुक्यापुरते सीमित राहणे उपयोगी नाही तर संजय मामा शिंदे यांच्या ज्ञानाचा त्यांच्या संघटन कौशल्याचा उपयोग जिल्ह्यातही व्हायला पाहिजे. यादृष्टीने संजयमामानी प्रयत्न करावेत असे आवाहन त्यांनी केले. आ. संजयमामा शिंदे यांच्या जलसंपदा विभागाकडून ज्या मागण्या असतील त्या सर्व मागण्या आपण पूर्ण करू असा विश्वासही त्यांनी व्यक्त केला.
कार्यक्रमाचे आभार राष्ट्रवादी काँग्रेसचे तालुका अध्यक्ष संतोष वारे यांनी मानले. सूत्रसंचालन विनोद दोलतडे यांनी केले.
विकासरत्न आमदार म्हणून आ. संजयमामा शिंदे यांचा सत्कार याप्रसंगी जलसंपदामंत्री ना. जयंत पाटील व पालकमंत्री ना. दत्तामामा भरणे यांच्या हस्ते करण्यात आला.
About The Author
