वाशिंबेतील ‘होम मिनिस्टर’ कार्यक्रमात पैठणीचा खेळ रंगला; महिलांचा उत्स्फूर्त सहभाग
प्रतिनिधी l वाशिंबे (माय मराठी न्यूज)
जागतिक महिला दिनानिमित्त वाशिंबे (ता. करमाळा) येथे जिल्हा परिषद शाळेच्या प्रांगणात महिलांसाठी ‘होम मिनिस्टर’ या लोकप्रिय कार्यक्रमाचे उत्साहपूर्ण आयोजन करण्यात आले होते. ग्रामपंचायत वाशिंबे यांच्या वतीने विविध स्पर्धांच्या माध्यमातून हा कार्यक्रम रंगतदार करण्यात आला. कार्यक्रमाचे उद्घाटन श्रावण (भैय्या) जंगम, राष्ट्रीय अध्यक्ष जंगम संघटना तसेच राहुल बर्गे नगराध्यक्ष सातारा-कोरेगाव यांच्या हस्ते करण्यात आले. या कार्यक्रमासाठी पंचक्रोशीतील महिलांनी मोठ्या संख्येने उपस्थिती लावल्यामुळे संपूर्ण कार्यक्रमात उत्साहाचे वातावरण होते.
‘खेळ पैठणीचा’ या संकल्पनेवर आधारित या कार्यक्रमात महिलांनी विविध स्पर्धांमध्ये सहभाग घेत आनंद लुटला. स्पर्धांमधून विजेत्यांना आकर्षक बक्षिसे देण्यात आली. यामध्ये दिवेगव्हाण येथील अमृता उमेश खाटमोडे यांनी प्रथम क्रमांक पटकावत ‘होम मिनिस्टर’ चा किताब जिंकत फ्रिज हे बक्षीस मिळवीले. तर द्वितीय क्रमांक अंजली अतुल रणदिवे यांना पिठाची चक्की देण्यात आली. तसेच योगिता पंकज पवार यांना कुलर, तर भक्ती कळसाईत आणि सुप्रिया शिंदे यांना पैठणी देऊन गौरविण्यात आले.
यावेळी ग्रामपंचायत वाशिंबे यांच्या १५ व्या वित्त आयोगाच्या निधीतून महिलांच्या आरोग्य व सुरक्षिततेच्या दृष्टीने सॅनिटरी पॅडचे वाटप ही करण्यात आले.
या कार्यक्रमाचे यावर्षी दुसरे वर्ष असल्यामुळे महिलांमध्ये विशेष उत्सुकता दिसून आली. प्रत्येक महिलेमध्ये अनेक सुप्त कलागुण दडलेले असतात; मात्र संसाराच्या जबाबदाऱ्यांमुळे ते अनेकदा व्यक्त होऊ शकत नाहीत. या कार्यक्रमाच्या माध्यमातून महिलांना त्यांच्या कलागुणांना वाव मिळावा आणि त्यांना एक आनंददायी व्यासपीठ मिळावे, या उद्देशाने ग्रामपंचायत वाशिंबे यांच्या वतीने या उपक्रमाचे आयोजन करण्यात आले होते.
कार्यक्रमात महाराष्ट्रातील प्रसिद्ध अँकर क्रांती नाना माळेगावकर यांनी विविध स्पर्धा घेत वातावरण अधिक रंगतदार केले. यावेळी सरपंच, उपसरपंच, सर्व ग्रामपंचायत सदस्य तसेच गावातील नागरिक मोठ्या संख्येने उपस्थित होते. महिलांच्या उत्स्फूर्त सहभागामुळे कार्यक्रमाला विशेष रंग चढला.
About The Author
